Elle avait di tieusain d’ son tchaipé

Tiaind qu’èlle é r’ci le tchaipé qu’èlle aivait commaindè en leingne, èlle s’ât empreussie d’ l’essaiyie. C’était ïn tchaipé en feutre, fait en lai main. Èl était oûernè d’ïn riban, d’ènne pieume èt de çhoès. Bon, è n’était p’ bèyie: 120 francs po ïn tchaipé! Mains lai biâtè n’é p’ de prix. Drassie d’vaint son mirou, son nové tchaipé ch’ lai téte, èlle se craiyait lai reinne Élisabeth. È fât dire qu’èlle aivait bïn di djèt. Ci tchaipé f’sait d’èlle ènne fanne d’ lai hâte. Èlle v’lait voûere mit’naint quél effèt ci tchaipé f’rait chu les dgens.

Èlle enf’lé ènne londye djupe èt soutché â d’vaint l’heus. È f’sait touffe. Le cie était noi. «I airôs daivu pâre in pairaipieudge, qu’èlle se dyait, taint pé. I n’ veus p’ retouénaie.»

Èlle mairtchait fier’ment dains lai vèlle tiaind qu’ les premieres gottes s’ bottainnent è tchoére. « Mon Dûe, mon tchaipé! «Vite, èlle reyeuve sai londye djupe chu sai téte èt ritte se bottaie en lai sôte. Ïn boûebat lai raivoéte èt écâçhe: «Daime, i aî vu … i aî vu…»

– T’és vu mai tyulatte. Èt peus quoi? Te sairés, nitiou, qu’ mon tchaipé m’é cotè 120 francs. Lai tyulatte était en aiction, trâs po ènne.

Retrouvez et écoutez l’article complet et lisez sa traduction sur https://www.image-jura.ch/djasans/spip.php?rubrique244