En lai banque
© LQJ
En ç’temps-li, an payait ses impôts en ïn seul côp en lai fïn d’ l’annèe. Le contribuâbye était taxè tos les dous ans. Bïn chûr, tyaind qu’on ne paie ses impôts qu’ïn seul côp en fïn d’annèe, çoli fait ènne grante somme.
Ïn régent était â guichèt d’ lai banque en train de r’ytirie des sôs po paiyie ses impôts, quéques byats de cent. Èl entend qu’an l’aippele. È r’coégnât lai voix d’ïn ancien éyeuve qu’aittendait son toué dains lai quoûe. D’hèrtaidge en hèrtaidge, ci tchainçou s’était conchtrut ènne bèlle foûetchune. È pochédait trâs fèrmes, dous qu’èl aimôdiait, èt çtée qu’èl échploitait. È v’niait en lai banque non po r’tyirie des sôs mains po en dépojaie chu son compte. È les aivait ch’ le dos dains ïn hâvresait. Èl aivait voidgè ïn bon seuv’ni d’ l’écôle, çoli n’ l’empatchait pe d’yaincie des pityes és régents tchéque côp qu’èl en trovait yun chu son tch’mïn. Çtu d’vaint lu â guichèt, è l’ainmait bïn mains è n’ le ménaidgeait pe.
– Eh, qu’è yi dit, ces régents, ès en dyaindgnant des sôs po poéyait en r’tyirie ataint.
Son véye maître l’é bïn r’baquè.
– Moi, qu’è yi é réponju, è n’ me fât p’ïn sait po les poétchaie en la banque.
Note
èl aimôdait, il louait.