Ïn baboéyè
© LQJ
Ïn djûene hanne baidgelait, baidgelait, baidgelait. An n’ saivait l’ faire è râtaie. Niun âtoé d’ lai tâle ne poèyait pyaicie ïn mot. Èl aivait tot vu, èl aivait tot yét, è saivait tot. Ènne fanne çhiouçhé dains l’aroiye de sai véjine: «È djâse cment sïnt Dgeoûrdge, poi lai goûrdge.»
- Ô, è nôs scie l’ dôs d’aivô ènne sciatte de bôs.
- Èt peus, cment qu’an dit: Grôs djâsou, grôs mentou.
 bout d’ïn quât d’hoûere, pus niun n’ l’écoutait. Ïn véye se yeuvé. Le djûene hanne se musait: «Qu’at-ce qu’è m’ veut, çtu-ci?» Mains è s’ coidgé tot d’ meinme.
Le véye saidge yi dit: «An t’ont léchi djâsaie ïn bon quât d’hoûere. Ci côp, ç’ât mon toué. Oh, i n’en aî p’ po grant. Ènne tote petète quèchtion. Te m’ rèponds s’ te veus. Ât-ce que t’ peus m’ dire, toi qu’és tot vu, toi qu’ és tot yét, toi que sais tot, poquoi l’ Bon Dûe nôs é bèyie dous aroiyes èt peus ran qu’ènne boûtche?
Le baboéyè, qu’aivait pavou de tchoère dains les lais, ne réponjé pe.
- Éh bïn, bé djâsou, i t’ le veus dire: Nôs dains dous côps pus écoutaie que djâsaie.
Notes
tchoère dains les lais, tomber dans un piège, se faire piéger.