Lai fôle di mairiaidge èt d’ lai mè

En ci temps-li, les fannes faisïnt encoé yote pain. Élles éy’vïnt ènne rote de nitious que ne coégnéchïnt qu’ïn seul pain, le moyou, çtu de yote mére. En ci temps-li, l’hanne en aîdge de s’ mairiaie eurtçheurait lai fanne que yi tyeudrait di bon pain, que yi f’rait ènne rote de nitious, que tyïndrait l’ ménaidge, que yi r’tacoénn’rait ses tyulattes, que yi tchâssen’rait des tchâsses po l’huvie. Que s’rait fidèye tote sai vétyaince èt que çhiourait les eûyes ch’ les étchaippâles de son hanne.

Ci Djustin qu’aippreutchait des quairante ans sondgeait è s’ mairiaie. Èl aivait des étius, des tieres, ïn grant feumie d’vaint lai mâjon. Èl y vétyait tot d’ pai lu d’aivô sai véye mére qu’airait bïn v’lu ènne bèlle-fèye èt des p’tèts l’afaints. Ch’ le consèye de sai mére, è s’entouéré le peuce drèt d’ïn bandaidge èt paitché en tcheusse. È soénne tchie lai bèlle Mairion.

– Yè mon Dûe, Djustin, qu’ât-ce t’és fait?

– Ç’ n’ât ran. I m’ seus fotu ïn métchaint côp d’ chârpe ch’ le peuce. An m’ont dit que, bïn entouérè d’ paîte, è veut vite étre eur’voiri. Te sais, de çtée que d’ moére dains lai mé tiaind qu’ te fais â fouè.

– Oh bïn, d’ lai paîte, i en aî taint qu’ t’en veus. I veus raîçhaie lai mé. T’en airés ïn bon saitchat.

De li, Djustin s’en feut caquaie en lai poûetche de l’Amélie, ènne poûere coudri sains le sô.

– Des rèchtes de paîte? I n’en n’aî pe.

– T’ n’és p’ fait â fouè ci maitïn?

– Chié, mains raivoéte, lai mé ât nentoiyie.

Le dûemoéne que cheuyait, le tyurie ainnoncé di hât de lai tchaïre: «È yé promèche de mairiaidge entre ci Djustin èt çt’Amélie.»

Notes

les étchaippâles, les aventures extra-conjugales, les infidélités.

Retrouvez et écoutez l’article complet et lisez sa traduction sur https://www.image-jura.ch/djasans/spip.php?rubrique264