Lai moûe di sains-Dûe
© LQJ
Le véye Roudi se dyait sains r’ligion. An
n’ sait trop po qué réjon è n’ botait pus ïn pie â môtie. Sains étre ènne rainne d’aibnétie, sai fanne praitityait, lu pe. Poétchaint, ç’ n’était p’ïn bâfre-tiurie. Tot â contraire.
È s’entendait bïn d’aivô not’ chire. È le r’trovait â Câfé d’ l’Aindge po djûere és
câtches, d’aivô le poétchou d’ lattres, ïn tot noi, èt l’maire, ïn tot roudge.
– I n’ crais ne en diaîle ne en Dûe, qu’è s’ pyaijait è dire.
Lai musatte de sai fïn chu tiere ne yi f’sait pe pavou.
– Tiaind qu’i sentiré lai moûe v’ni, qu’è dyait, i m’ veus trïnnaie djjuqu’en lai Vouâvre. Vôs saites le grant tcheînne que fait l’andye, i veus y çhoulaie mes drieres v’lantès graiy’nèes chu ïn cairton. Èl ât dje tot prât. I m’ veus sietaie â pie d’ ci tcheînne, i veus çhoûere les eûyes èt peus i veus aittendre. Çtu que m’ trov’ré diré «Voili l’ Roudi que doûe.» Peus è yéré chu mai pancarte: «Entierèz-me ci!» È me ch’coueré. «Crais bïn qu’èl ât moûe.» Peus è ritt’ré â v’laidge de tote lai vitesse de ses sabats.
Le véye Roudi ât moûe dains son yét. Sai fanne é fait v’ni l’ tiurie.
Note
lai Vouâvre, forêt sur Damphreux-Lugnez
Retrouvez et écoutez l’article complet et lisez sa traduction sur https://www.image-jura.ch/djasans/spip.php?rubrique264