Négochiâchion
© LQJ
Dâ tyïnze annèes qu’èl ât en l’ujine, le p’tèt Laon tchie l’ Grôs – son pére s’aippeule âchi Laon – é aidé lai meinme paiye. Èl ât d’moérè â bés d’ l’étchiele. È trove çoli indjuste, lu qu’ât ïn conscienciou l’ ôvri, touedje en l’hoûere, èt qu’ n’é p’ djemais maintyè ïn djouè d’ traivaiye. Djuqu’è mit’naint, totes ses d’maindes sont aivu r’fujèes. Çoli n’ peut pus durie.
En arrivaint en son pochte ci maitïn, è dit en ses caim’rades:
– I aî t’aivu d’ lai paitience, brament. I aî aittendu, mains mit’naint çoli seuffit. I aî rendèz-vôs és dieche d’aivô l’ paitron. I yi veus dire: O bïn vôs m’augmentèz, o bïn i m’en vais!
Le contremaître: «T’ veus vrâment yi djâsaie dïnche? T’en airés l’ coéraidge toi que t’ fais aidé rôlaie?»
– Yé bïn, ci côp, i n’ veus p’ me léchie faire. I en aî pus que prou. Vôs v’lèz voûere ç’ qu’ vôs v’lèz voûere.
Pô d’vaint les dieche, è s’yeuve, è tyitte sai maichine. È s’rend â cab’nèt di diridjou d’ïn pas déchidè. Ïn quât d’hoûere pus taîd, èl ât de r’toé.
– Dâli, yi d’mainde le contremaître, t’yi és djâsè â paitron. È t’és aiccoédgè ç’ que te v’lais?
– Ç’ n’ât chi sïmpye. È m’é djâsè d’ lai situâchion économitye. Ç’ n’ât p’aijie po lu non pus. Les commaindes ne râtant pe d’béchi È dait tot d’ meinme faire touénaie son aiffaire. Nôs ains dichcutè entre hannes èt, po fini, nôs ains copè lai poire en dous: È n’ m’augmente pe çt’annèe, èt pe moi i d’moére. Mains l’an qu’ vïnt, vôs v’lèz voûere ç’ qu’ vôs v’lèz voûere.