Yutte po lai mairie
© LQJ
Source: Jean-Marie Voirol, Porrentruy
Le nové maire avait été invitè en ïn vèrnissaidge ïn métçhedi en fïn de vâprèe. «Te ne rentrerés pe trop taîd, yi dit sai fanne. È y é ènne cheurprije que t’aittend.»
Tos les vèrnissaidges sont cheuyès d’ïn apéro d’aivô des p’tèts aimuse-dyeule è maîtcheyie. Èl en é profitè po se r’tyirie dichcrètement.
En airrivaint en l’hôtâ, è feut tot ébâbi de voûere d’ lai lumiere dains totes les pieces. À d’vaint l’heus, des gens étïnt en train de piaintaie ïn mé pour son élèction. Èl é dit bondjouè en tus, è les é tus eurméchiès.
Le mé était euffie poi lai bordgeaisie. Le présideint des bordgés é pris lai pairôle. È n’était p’ en son aije poéche qu’èl aivait yuttè contre lu. È n’ saivait p’ trop quoi dire, èI était dgeinnè, è tçherait ses mots.
En lai fïn de son dichcouè, le nové maire s’ât aippreutchè d’ lu èt yi é dit : «Nôs sons en démocraitie. Vôs aivïns l’ drèt d’ vôs échprimaie aivaint les votes. I vôs fais ènne propojichion, qu’ dâ mit’naint, an s’ tutoiyeuche.» Èl é aiccèptè aich’tôt. Ès se sont bèyie lai main èt, poi lai cheute, ès sont dev’nis des preutches aimis.